रोसन काफ्ले
माइजोगमाई – इलामको फिक्कल–गुप्ती–नयाँबजार सडक कालोपत्रे भएको करिब वर्षदिन भयो ।
मोटरेबल बाटोको ट्र्याक खुलेको चार दशकपछि यो बाटो कालोपत्रे भएको थियो । बाटो कालोपत्रे भएसँगै सूर्योदय नगरपालिका, माइजोगमाई गाउँपालिका, इलाम नगरपालिका र सन्दकपुर गाउँपालिकाका बासिन्दा प्रत्यक्ष लाभान्वित भए ।
बाटो बनिएसँगै बिरामी र अशक्तलाई यात्रा गर्न सहज भएको छ । तर, गत असोजको वर्षामा धेरै ठाउँमा पहिरो झरेपछि केही दिन सवारीका साधन बन्दसमेत भए । ती भत्किएका ठाउँमा गाडी त चलाउनसम्म त चलाइयो तर अझैसम्म सडकमा थुप्रिएको पहिरो हटाउन कसैले चासो दिएको छैन ।
पहिरो नसोहोर्दा बाटोको बीच भागमा माटो तथा ढुंगाको पहाडझैं छ । माटोका ती ढिस्कनाले सवारी दुर्घटनाको जोखिमसमेत बढाएको छ । दिनहुँ दुई सयभन्दा धेरै मोटरसाइकल र सयभन्दा धेरै साना–ठूला गाडी यो बाटो भएर गुड्ने अनुमान छ । भत्किएका ठाउँमा दुई गाडी भेट भए रोकेर पालो गरेर सडक पार गर्नुपर्ने अवस्था छ ।
कतिपय त गोलाई भएकै ठाउँमा भत्किएकाले गाडी कुदाउन अनि अर्को साइडतिरबाट आएको गाडी पनि नदेखिने भएकाले असहज भएको सवारी चालक बताउँछन् ।
त्यसो त, माइजोगमाईतर्फका धेरै बाटा भत्किएका छन् । तिनको मर्मतमा पालिका र वडाले कुनै चासो देखाएका छैनन् । कतिपय ठाउँमा पालिका, सडक कार्यालय, निर्माणकर्ता कम्पनी वा कसले मर्मत गर्ने भन्ने स्पष्टसमेत छैन ।
माइजोगमाई गाउँपालिका उपाध्यक्ष प्रविना राईले प्रहरी चौकी, वडाका जनप्रतिनिधि राखेर अनुगम गरी सर्जमिन गरेर मुचुल्का तयार गरी भौतिक पूर्वाधार मन्त्रालयमा बजेट माग गरिसकेको जानकारी दिइन् । ‘ठेकेदार कम्पनीको मातहतमा रहेकाले पालिकाले काम गर्न नमिल्ने हुँदा मन्त्रालयसँग माग गरेका छौं,’ उनले भनिन् ।
यो मुख्य सडक कालोपत्रे गर्ने खनाल कन्ट्रक्सन कम्पनीका सुमन खनालले प्रदेशमार्फत ठेक्का परेको र गत वैशाखमा बाटोको काम सकिएपनि कम्पनीले पाउनुपर्ने रकम प्रदेशले रोकेका कारण बिग्रिएको ठाउँ मर्मतमा ढिलो भएको बताए । प्रदेश सरकारले रोकेको रकम दिए बिग्रिएको बाटो बनाउने उनको भनाइ छ ।
असोजको वर्षाले सूर्योदय–९, ढोडेमा पहिरो झरेर सडक क्षति गरेको छ । अन्य ठाउँमा माथिबाट पहिरो झरेर बाटोको बीचमा ढुंगा, माटोसहितका थुप्रा धेरै हुँदा दुर्घटनाको जोखिम बढेको हो ।
