झापाको पहिलो स्नातक तहको इन्जिनियरिङ कलेज पाथिभरा इन्जिनियरिङ कलेजले पत्रकारितामा एआइ (कृत्रिम बौद्धिकता) को प्रयोगबारे प्रशिक्षण दिएको छ ।
प्रमुख कार्यकारी अधिकृत अनुज पराजुलीका अनुसार बिर्तामोडको नयाँ बसपार्कस्थित कलेजको सभाहलमा आयोजना गरिएको प्रशिक्षणमा झापाका २६ पत्रकारको सहभागिता रहेको थियो।
सन्चालित प्रशिक्षण कार्यक्रममा वरिष्ठ कम्प्युटर इन्जिनियर प्राध्यापक शितलकुमार मण्डल र रोशन भट्टराईले फोटो, अडियो, भिडियो निर्माण, कन्टेन्ट क्रियसन र सर्च इन्जिन अप्टिमाइजेसनका बारेमा प्रस्तुति दिएका थिए ।
कार्यक्रम कलेजका अध्यक्ष युवराज प्रसाईंको अध्यक्षतामा सम्पन्न भएको थियो भने प्रशिक्षणले पत्रकारको दैनिक कार्यका लागि सहयोगी र उपयोगी भूमिका निर्वाह गर्ने पराजुलीको भनाइ थियो ।
यसैबीच, कलेजकै आयोजनामा बिइ सिभिल र कम्प्युटर इन्जिनियरिङ चौथो सेमेस्टरका विद्यार्थीहरूलाई ‘प्रपोजल राइटिङ’ का विषयमा कार्यशाला गोष्ठी समेत सम्पन्न भएको छ ।
उक्त कार्यक्रमको सहजीकरण वरिष्ठ कम्प्युटर इन्जिनियर प्राध्यापक शितलकुमार मण्डलले गरेका थिए ।
कलेजले नियमित पाठ्यक्रमका विषयबाहेक जीवनोपयोगी विभिन्न सीपहरू, अतिरिक्त कक्षा, सेमिनार, वर्कसपमार्फत नियमित रूपमा सञ्चालन गर्दै आएको बताइएको छ ।
