कन्यामपोस्ट संवाददाता ।
ईलाम । फाकफोकथुम गाउँपालिका ७ एकतप्पा स्थित दोकान डाँडामा खेलकुद विकास समितिले आयोजना गरेको शुभ दीपावली कप फुटबलएकतप्पा प्रतियोगितामा आजको खेलबाट कोलबोटे एफसी र फुङनाम स्पोर्टिङ एफसी चुलाचुली विजयी हुँदै सेमिफाइनलमा प्रवेश गरेका छन् ।
जनकल्याण माविको खेलमैदानमा भएको तेस्रो क्वाटरफाइनल खेलमा कोलबोटेले जुनतारा एफसी माङसेबुङलाई ३-१ गोलअन्तरले पराजित गर्दै सेमिफाइनल प्रवेश गर्ने तेस्रो टिम बन्यो ।
कोलबोटेका लागि दिनेश शेर्माले खेलको ७ मिनेटमै गोल गरेर सुरुवाती अग्रता दिलाएका थिए । १ मिनेटपछि सन्तोष लिम्बूले गोल गर्दै टोलीको अग्रता दोब्बर बनाए ।
यस्तै, खेलको ४९औँ मिनेटमा शुकराज राईले थप गोल गर्दै टोलीको जित सुनिश्चित गरे । उनी म्यान अफ दी म्याच घोषितहुँदै नगद पुरस्कार र ट्रफी पाउन सफल भए ।
माङसेबुङका लागि ३५औँ मिनेटमा कप्तान मनु लिम्बूले गोल गरे पनि खेलमा फर्कन सकेन । माङसेबुङ दोस्रो चरणमै घर फर्कियो ।
यस्तै, अन्तिम क्वाटरफाइनल खेलमा चुलाचुलीले टाइब्रेकरमा बाजी मारेको हो । उसले स्पर्धी लिटल किकर्स एफसी दमकलाई पराजित गर्दै अन्तिम चारमा स्थान सुरक्षित गर्यो ।
खेलको निर्धारित समय दुवै टोलीले गोलरहित बराबरी खेलेका थिए । खेलको निर्णय टाइब्रेकरबाट लिइएको थियो । जसमा दकलाई ४-२ गोलअन्तरमा पराजित गर्दै चुलाचुलीले सेमिफाइनल यात्रा तय गर्यो । खेलको म्यान अफ दी म्याच गोलकिपर युविन राई भए ।
यही कार्तिक २५गते फाईनल खेल आयोजना हुने यस प्रतियोगितामा १६ टोली सहभागी छन् ।प्रतियोगिताको विजेताले नगदद १ लाख २५ हजार तथा उपविजेताले नगद ७५ हजार प्राप्त गर्ने बताईएको छ।
