पाथीभरा मन्दिरमा कात्तिक महिनामा ३७ लाख ४४ हजार ७ सय ५० रुपैयाँ भेटी संकलन भएको छ, जुन आर्थिक वर्षको अहिलेसम्मकै उच्च रकम हो। पाथीभरा क्षेत्र विकास समितिका कार्यकारी निर्देशक प्रजिन हाङबाङका अनुसार, यो महिनामा ६१ हजार १ सय ७३ तीर्थयात्रीले मन्दिरमा दर्शन गरेका थिए। भेटी रकम कर्मचारीद्वारा संकलन गरिन्छ, सदरमुकाम फुङलिङ ल्याएर गणना गरी बैंकमा जम्मा गरिन्छ। समितिले प्रत्येक महिनाको भेटी विवरण सार्वजनिक गर्दै आएको छ।
यस महिना, पाथीभरा क्षेत्रमा सरसफाई अभियान पनि सञ्चालन गरिएको थियो। काफ्लेपाटीदेखि मन्दिर क्षेत्रसम्म गरिएको अभियानमा तीनवटै सुरक्षा निकाय, कर्मचारी, सञ्चारकर्मी र स्थानीयवासीको सहभागीता रहेको थियो। अभियानबाट ८२५ केजी प्लाष्टिकजन्य वस्तु, २५ केजी सिसाका बोतल, ६५ केजी टिन तथा काठका टुक्रा, र ६५ केजी फलामका टुक्रा संकलन गरिएको थियो।
प्लाष्टिकजन्य फोहोर जलाएर नष्ट गरिएको र अन्य नकुहिने फोहोरलाई सुरक्षित स्थानमा व्यवस्थापन गरिएको छ। सरसफाई अभियानमा सहयोग गर्ने सबैलाई समितिले धन्यवाद व्यक्त गरेको छ।
