✍️ गोपाल गिरी

“ईन्द्रकमलको फूलमा दाग लाग्ला है, तिमी सँग जिन्दगीमा ज्यून मात्रै पाए मलाई…”
झन्डै दुई दशकअघि कन्यामका अधिकांश घरआँगन, गल्ली र विद्यालयमा गुञ्जिने यो कर्णप्रिय स्वर अकस्मात मौन भयो । फुल्न नपाउँदै कोपिला झैँ हुरीले उडाएको त्यो स्वर, समय र विवशतामा हरायो । तर सच्चा कलाकार कहिल्यै हराउँदैनन्, केवल समयमै फर्केर आउँछन्—यसको जीवन्त प्रमाण हुन् गायक सन्तोष शीवा ।
🎤 पहिलो स्वर, पहिलो यात्रा

सूर्योदय नगरपालिकाको रमणीय बस्तीमा जन्मेका सन्तोष शीवाको बाल्यकाल नै गीत–संगीतले भरिएको थियो । विद्यालयमा हुने सांस्कृतिक कार्यक्रममा गीत गाएर सबैको ध्यान खिच्ने उनी शिक्षक, साथी र शुभेच्छुकको प्रेरणामा अगाडि बढे । यही यात्राले उनलाई २०५७ सालमा ‘अनुराग’ नामक आठ गीत समेटिएको एल्बममार्फत श्रोता–मनमा परिचित गरायो ।
त्यो एल्बमका गीतमध्ये एक लोकप्रिय पंक्ति आज पनि धेरैका कानमा गुन्जिन्छ—
“न तिमीलाई पाउन सक्छु, न तिमीलाई भूल्न सक्छु, न चिठी लेख्न सक्छु…”
त्यतिबेला यी गीतले प्रेममा अल्झिएका युवा–युवतीलाई आत्मीय साथी झैँ महसुस गराएको थियो ।
⏸ मौनतामा हराएको स्वर
तर जीवनका यात्रा सधैँ सरल हुँदैनन् । पारिवारिक जिम्मेवारी, व्यवसायिक विवशता र जीवनका कठोर यथार्थले गर्दा शीवाको संगीतयात्रा ओझेल पर्‍यो । रेडियो नेपालमा आयोजना भएको प्रतियोगितामा उत्कृष्ट प्रदर्शन गर्दै टप–टेन् भित्र स्थान सुरक्षित गरे पनि त्यसपछि उनलाई दर्शक–श्रोता पर्खिनुपर्ने भयो । कन्याम छोडेर व्यवसायमा लागेपछि उनी संगीतप्रेमी मनबाट हराए ।
तर गीतले भने उनलाई कहिल्यै छाडेन । उनको आफ्नै स्वरले उनलाई सम्झाइरह्यो—
“जीवनको बाटोमा सँधै सम्झन आउने तिमीलाई कसरी भुल्न सक्छु र ?”
🌱 नयाँ उत्साह, नयाँ सिर्जना
समयले फेरि उनलाई संगीतमा फर्कायो ।   आफ्नै स्वर ,संगीत र शब्दमा  “हुरहुरेको चिसो हावा” रेकर्ड गरेर  गाए पछि उनी पुनः चर्चामा आए । अहिले भने उनी अझै आत्मविश्वासी देखिन्छन् । आफ्नो जन्मभूमि सूर्योदय–कन्यामलाई केन्द्रविन्दु बनाएर नयाँ गीत रेकर्ड गर्दै उनले संगीतलाई मात्रै होइन, पर्यटनलाई पनि परिचित गराउने लक्ष्य राखेका छन् ।
“गीतले केवल मनोरञ्जन मात्र होइन, ठाउँलाई चिनाउने जिम्मा पनि लिन सक्छ,” उनी भन्छन्, “त्यही सोचेर मैले आफ्नो गाउँ–घरलाई गीतमा उतारेको हुँ।”
🎬 अटो–रिक्सादेखि नयाँ गीतसम्म
केही वर्षअघि बजारमा आएको “अटो–रिक्सा” बोलको गीतको म्युजिक भिडियोले उनलाई पुनः श्रोता–दर्शकमाझ ल्यायो । यस गीतका रमाइला लाइनहरूले उनी फेरि शहरका गल्ली–गल्लीमा बज्न थाले । अहिले उनले तयार पारेको पर्यटकीय नगरी सूर्योदय  नगरपालिकाका विभिन्न स्थानहरुलाई समेटि   सिर्जना गरिएको नयाँ गीतले पनि त्यही सफलता दोहोर्‍याउने विश्वास छ । स्वर, शब्द र संगीत तीनै पक्षमा आफूलाई अब्बल देखाउने जीवन्त प्रयास  गरेको यस गीतमा उनले धेरै समय र मेहनत खर्चेका छन्  ।
🌄 स्वर फेरि सूर्योदयमा
दुई दशकअघि हराएको स्वर फेरि सूर्योदयको उषामा झैँ फर्किएको छ ।

उनी अब केवल गायक मात्र होइनन्, आफ्नै जन्मभूमिका सांगीतिक दूत बन्न चाहन्छन् । उनको पछिल्लो सिर्जना स्वर ,शब्द र संगीतको त्रिवेणी बनेर उभिएका ।सांगीतिक जीवनको यो पाटो उनको लागि कतिको सुगम छ त्यो भने हेर्न बाँकी नै छ।